Athugið breyttan umsóknarfrest, 14. apríl
Ertu með hugmynd að spennandi listahátíðum á Vesturlandi?
Við köllum eftir hugmyndum af hátíðum á svæðum á Vesturlandi þar sem listahátíðir eru alla jafna ekki að fara fram og uppfylla skilyrði sem sett eru fram verkefninu.
„Listahátíðir á Vesturlandi“ er hluti af áhersluverkefninu „Menningargróska“ og er sett fram til að efla framboð á faglegum listahátíðum í landshlutanum. Er þetta liður í að uppfylla markmið Sóknaráætlunar Vesturlands um að auka hlutdeild skapandi atvinnugreina í atvinnulífi svæðisins og að Vesturland verði þekkt fyrir ríkt menningarstarf með öflugari markaðssetningu.
Verkefnið er útfært þannig að gerður er samningur við aðila sem hyggjast efna til listahátíðar árið 2024, en skuldbinda sig til að undirbúa og skipuleggja sín verkefni með t.d. gerð fjármagns- og verkáætlana, skoðana á samskonar hátíðum og svo framvegis. Valin verða að hámarki þrjú verkefni til þátttöku og mun fá á bilinu 500-800 þúsund krónur í verkið. Auk þess munu ráðgjafar SSV veita ráðgjöf í ferlinu.
Makmiðið er að haustið 2023 verði tilbúið handrit að listahátíð sem má nýta til frekari fjármögnunar og umsókn í Uppbyggingarsjóð Vesturlands 2024.
Þau skilyrði sem verkefnin verða að uppfylla eru:
- Sé grasrótarhátíð – þ.e. hafi ekki farið fram áður
- Séu með sérhæfðum listgreinum – t.d. sviðslistir, myndlist, uppistand, hlaðvarp o.s.frv.
- Séu ekki bæjarhátíðir eða íþróttaviðburðir
- Sveitarfélög og stofnanir í opinberum rekstri hafa ekki rétt á þátttöku
- Kostur er að hugað sé að barnamenningu
- Hafi verkefnastjórnanda og/eða listrænan stjórnanda sem hefur hlotið menntun og/eða reynslu í viðkomandi listgrein
- Með framkvæmd viðburðarins skapist atvinnu- og viðskiptatækifæri fyrir ferðaþjónustaðila á starfsvæði hátíðanna
- Fari ekki í beina samkeppni við aðrar listahátíðir eða menningarviðburði á Vesturlandi
Skipaður verður starfshópur á vegum SSV sem annast val og samningagerð við verkefnastjóra hátíðanna. Hópurinn áskilur sér þann rétt að hafna öllum innsendum umsóknum. Tengiliður SSV er Sigursteinn Sigurðsson menningarfulltrúi.
Umsóknir skulu berast í tölvupósti til menningarfulltrúa og skulu vera í formi greinargerðar, eigi lengi en ein A4 síða og ferilskrár umsækjenda. Fylgiskjöl eins og myndir, teikningar og meðmæli er kostur en ekki skilyrði. Farið verður með allar innsendar umsóknir sem trúnaðarmál. Skilafrestur umsókna er til og með 14. apríl 2023.
