Út er komin skýrslan Viðskiptahugmyndir á Vesturlandi. Skýrslan varpar ljósi á niðurstöður skoðanakönnunar um hugmyndir Vestlendinga að tækifærum í atvinnulífinu sem framkvæmd var sumarið 2023.
Samtök Sveitarfélaga á Vesturlandi, NýVest og Gleipnir stóðu saman að frumkvöðla- og fyrirtækjamótinu Nýsköpun í Vestri þann 29. september 2023 og viðskiptahraðlinum Vesturbrú sem fram fór síðastliðinn vetur og var skoðanakönnunin liður í undirbúningi fyrir þessa viðburði.
Markmiðið með könnuninni var að kanna viðhorf íbúa til nýsköpunar á Vesturlandi og kalla fram hugmyndir að tækifærum í atvinnulífinu. 1000 manns tóku þátt í könnuninni, og samtals voru 384 af þeim sem svöruðu annað hvort með viðskiptahugmynd eða áætlun um nýsköpun í rekstri.
Flestar viðskiptahugmyndir tengdust þjónustu við ferðamenn og þegar viðhorf til tækifæra í mismunandi atvinnugreinum eða flokkum var greint niður á einstök sveitarfélög, kom í ljós að þær atvinnugreinar eða starfsemi sem þegar er hefð fyrir, virðast helst eiga tækifæri á hverjum stað fyrir sig.
Tilgangurinn með könnuninni var einnig að sjá hvaða hindranir væru til staðar og í ljós kom að helstu hindranir eru fólgnar í húsnæðisskorti, skipulagsmálum og fjármagni. Þá var spurt hvort stuðningur utanaðkomandi aðila gæti haft áhrif á að hugmyndin yrði að veruleika og í ljós kom að fjármagn, sveitarfélag og styrkjaaðstoð voru þeir þættir sem þátttakendur nefndu helst.
