Samtök sveitarfélaga á Vesturlandi settu af stað verkefnið „Nýsköpunarnet Vesturlands“ á dögunum en það  hlaut styrk í desember 2020 úr stefnumótandi byggðaáætlun fyrir árin 2018-2024 til sértækra verkefna sóknaráætlanasvæða (liður c1).

Verkefnið Nýsköpunarnet Vesturlands felst í því að tengja saman þá aðila sem vinna að nýsköpun á Vesturlandi og efla þau nýsköpunarsetur og samvinnurými sem eru að stíga sín fyrstu spor í flestum sveitarfélögum á Vesturlandi. Á svæðinu eru tveir háskólar, þrír framhaldsskólar, símenntunarmiðstöð, þekkingarsetur og öflugt atvinnulíf.  Markmiðið með Nýsköpunarnetinu er m.a. að tengja saman setrin og hið öfluga þekkingarsamfélag sem við eigum á Vesturlandi.

Nýsköpunarsetrin og samvinnurýmin verða í lykilhlutverki í nýsköpunarnetinu. Stefnt er að því að þar verði hægt að nálgast faglegan stuðning og sækja erindi og fræðslu um frumkvöðla og nýsköpun. Nýsköpunarnetið stuðli þannig að aukinni umræðu og skoðanaskiptum og efli tækifæri til atvinnusköpunar á Vesturlandi.

Í nýskipaðri verkefnastjórn Nýsköpunarnetsins sitja Gísli Gíslason  sem er formaður stjórnarinnar, Helena Guttormsdóttir, Stefán Valgarð Kalmansson, Jakob Kristjánsson og Rut Ragnarsdóttir. Starfsmaður verkefnisinsstjórnar er Helga Guðjónsdóttir atvinnuráðgjafi. Jafnframt sitja fundi stjórnarinnar Ólafur Sveinsson atvinnuráðgjafi og Páll Brynjarsson framkvæmdastjóri.

Verkefnastjórnin hittist á fyrsta fundi s.l. föstudag þar sem farið var yfir stöðuna á Vesturlandi og línur lagðar um næstu skref. Skemmtilegar umræður sköpuðust um málið og verkefnastjórnin hlakkar til áframhaldandi vinnu við Nýsköpunarnet Vesturlands.