Föstudaginn 24. janúar fór fram útlutunarhátíð Uppbyggingarsjóðs Vesturlands í Grundarfirði. Úthluað var tæplega 48,5 mkr. og hlutu 68 verkefni styrk.  Þetta var fyrri útlutun ársins og endurspeglar áframhaldandi stuðning sjóðsins við nýsköpun, atvinnuþróun og menningu á Vesturlandi. Alls bárust 111 umsóknir í þessari útlutun, sem sýnir þann mikla áhuga á stuðningi við framfarir og þróun í landshlutanum. Verkefnin sem hlutu styrk falla undir þrjá flokka: menningarstyrki, stofn- og rekstrarstyrki menningarmála, og styrki til atvinnu- og nýsköpunarverkefna.

Til atvinnu- og nýsköpunarverkefna var úthlutað 11,5 mkr. til alls 15 verkefna. Menningarstyrkir voru veittir fyrir samtals 32,2 mkr. til 47 verkefna, og loks var 4,7 mkr. úthlutað í 6 stofn- og rekstrarstyrki til menningarmála.

Uppbyggingarsjóður Vesturlands er hluti af Sóknaráætlun Vesturlands, sem markar stefnu og framtíðarsýn svæðisins. Frá árinu 2015 hefur sjóðurinn veitt styrki að heildarupphæð rúmlega 650 mkr. til yfir 570 verkefna. Útlutunarnefnd sjóðsins hefur það hlutverk að taka endanlegar ákvarðanir um styrkveitingar en nefndin fær tillögu frá fagráði menningar og fagráði atvinnu og nýsköpunar sem meta allar umsóknir.

Í seinni úthlutun ársins sem verður auglýst í ágúst verður hægt að sækja um styrki í atvinnu- og nýsköpunarverkefni.