Vel var mætt á opinn fund innviðaráðherra sem fór fram í Borgarnesi 13 ágúst sl. Á fundinn fór ráðherra yfir helstu verkefni sem eru á könnu innviðaráðuneytisins, en þau eru samgöngumál, fjarskipti, sveitarstjórnarmál og byggðamál. Einnig var Páll S. Brynjarsson framkvæmdastjóri SSV með kynningu á helstu áherslum sveitarfélaganna á Vesturlandi varðandi þessa málaflokka.
Mikil umræða hefur verið að undanförnu um slæma stöðu í vegamálum á Vesturlandi og komu margir fundarmanna inn á þá stöðu. Bergþóra Þorkelsdóttir forstjóri Vegagerðarinnar og Pálmi Sævarsson svæðisstjóri á Vestursvæði Vegagerðarinnar tóku þátt í umræðunum sem voru góðar og gagnlegar og skila vonandi breytingum á væntanlegri samgönguáætlun, Vesturlandi til hagsbóta.
