Uppbyggingarsjóður Vesturlands úthlutar 48. milljónum

Föstudaginn 20. janúar veitti Uppbyggingarsjóður Vesturlands styrki til verkefna sem efla munu atvinnuþróun og menningu í landshlutanum. Heildarupphæð styrkja nam 48.080.000 króna. Þetta er níunda árið sem sjóðurinn úthlutar styrkjum til annars vegar menningarverkefna og hins vegar atvinnu- og nýsköpunarverkefna í samræmi við Sóknaráætlun Vesturlands.

Úthlutunarhátíðin var haldin á Breið nýsköpunarsetri á Akranesi og var gríðarlega góð mæting þó svo að veður og færð hafi truflað nokkuð þar sem flestir styrkhafar frá Snæfellsnesi komust ekki vegna lokana á vegum. Undanfarin tvö ár hefur stærri úthlutun sjóðsins farið fram á netinu eingöngu vegna heimsfaraldursins og því var einstaklega ánægjulegt að koma saman og hitta alla þá frjóu og öflugu Vestlendinga sem hlutu styrki í ár. Páll S. Brynjarsson framkvæmdarstjóri SSV opnaði hátíðina  og var dagskráin þéttskipuð en ásamt því að veita styrki var kynnig á verkefninu “Dalahvítlaukur”, Gísli Einarsson steig á stokk og fór með part úr sýningunni sinni “Ferðabók Gísla Einarssonar” sem er nú í sýningu í Landnámssetrinu og hlaut styrk frá sjóðnum í fyrra. Þá var tónlistaratriði frá Smiðjuloftinu og kynning á InSitu verkefninu sem er í höndum Rannsóknarseturs skapandi greina á Bifröst. Í lokin var boðið upp á léttar veitingar og hátíðargestir tóku spjallið um menningu og atvinnulíf. Kynnir á úthlutunarhátíðinni var Svala Svavarsdóttir verkefnastjóri Uppbyggingarsjóðs, Ólafur Sveinsson atvinnuráðgjafi kynnti úthlutunanir í flokki atvinnu- og nýsköpunarverkefna og Sigursteinn Sigurðsson menningarfulltrúa kynnti úthlutunanir í flokki menningarverkefna. Þá afhenti Helena Guttormsdóttir formaður úthlutunarnefndar styrkina ásamt Ólöfu Guðmundsdóttur atvinnuráðgjafa og Guðveig Eyglóardóttir formaður SSV sleit hátíðinni.

Alls bárust 121 umsókn, veittir voru styrkir til 81 verkefnis en í heildina var sótt um samanlagt um rúmlega 172 mkr.

Þetta var fyrri úthlutun ársins en síðsumars verður aftur opnað fyrir umsóknir í flokki atvinnu- og nýsköpunarstyrkja.  Að þessu sinni hlutu 57 verkefni á sviði menningar styrki sem námu 27.450.000 kr. , 19 verkefni hlutu styrki til atvinnuþróunar upp á alls 15.880.000 kr. og þá voru veittar 4.750.000 kr. til 5 stofn- og rekstrarverkefna á sviði menningar.

Mikill fjölbreytileiki er í verkefnunum og í atvinnu- og nýsköpunarumsóknum voru flestar umsóknir í flokki matvæla og ferðaþjónustu en einnig komu umsóknir í flokki líftækni, landbúnaðar ásamt verslun og þjónustu. Áfram er mikill kraftur og frjó hugsun hjá listafólki og þeim sem starfa í menningartengdum greinum sem mun efla menningu á Vesturlandi.

Hér má sjá hvaða verkefni hlutu styrk:

https://www.youtube.com/watch?v=Ki7aODYDHIA