Uppbyggingarsjóður Vesturlands úthlutar tæplega 48 milljónum

Í dag 14. janúar voru veittir 95 styrkir úr Uppbyggingarsjóði Vesturlands til verkefna sem efla munu atvinnuþróun og menningu í landshlutanum. Heildarupphæð styrkja nam 47.580.000 króna. Þetta er áttunda árið sem sjóðurinn úthlutar styrkjum til annars vegar menningarverkefna og hins vegar atvinnu- og nýsköpunarverkefna í samræmi við Sóknaráætlun Vesturlands. Í ár var úthlutunarhátíðin rafræn og send út á youtube rás SSV.

Alls bárust 127 umsóknir og í heildina sóttu verkefnin samanlagt um rúmlega 224 mkr.

Þetta var fyrri úthlutun ársins en síðsumars verður aftur úthlutað í flokki atvinnu- og nýsköpunarstyrkja.  Í dag hlutu 72 verkefni á sviði menningar styrki sem námu 29.200.000 kr. , 17 verkefni hlutu styrki til atvinnuþróunar upp á alls 13.470.000 kr. og þá voru veittar 4.910.000 kr. til 6 stofn- og rekstrarverkefna á sviði menningar.

Mikill fjölbreytileiki er í verkefnunum og það kveður við nýjan tón í nýsköpunarverkefnum þar sem umsóknir er varða líftækni bárust sem er áhugaverð þróun og stefnir í mikla grósku á því sviði. Áfram er mikill kraftur og frjó hugsun hjá listafólki og þeim sem starfa í menningartengdum greinum sem mun efla menningu á Vesturlandi.

Hér má sjá myndband frá úthlutuninni: ÚTHLUTUNARHÁTÍÐ