Nýr vefur Listar fyrir alla opnaður

Nú hefur List fyrir alla opnað glæsilegan vef sem er gerður til að auka aðgengi barna og ungmenna að menningartengdri starfsemi um allt land. Á kortasjá má á einfaldan hátt sjá yfirlit yfir söfn, sýningar og setur sem bjóða börn og unglinga sérstaklega velkomin. Á Vesturlandi er fjöldi menningarhúsa sem standa til boða auk vinnustofa listamanna sem gleðja huga og sál. Á síðunni er margt fleira áhugavert til að kynna sér, t.d. viðburði, barnamenningarhátíðir og fleira skemmtileg. Starfandi listafólki gefst jafnframt kostur á að koma sínu starfi og verkefnum á framfæri.

List fyrir alla er ein af aðgerð byggðaáætlunar Stjórnarráðsins sem miðast við að öll börn og unglingar hafi jafnan aðgang að menningu og listum óháð búsetu og efnahag. Verkefnið er í samstarfi við menningarstofnanir af ýmsu tagi, og þar á meðal við menningarfulltrúa SSV sem er tengiliður Vesturlands við verkefnið. List fyrir alla er á forræði Mennta- og menningarmálaráðuneytisins.

Vefsíðan var sem áður segir opnuð formlega við hátíðlega athöfn í listasafni Einars Jónssonar á Skólavörðuholti síðastliðinn föstudag. Í tilefni þess hittust svokallaðir menningartenglar grunnskólanna, en eitt af verkefnum Listar fyrir alla er að efla samstarf listgreinakennara á öllu landinu, með þeim markmiðum að efla listsköpun barna og ungmenna. Á meðfylgjandi ljósmynd má sjá Elfu Lilju Gísladóttur opna vefinn í listasafninu.

Vefsíða: List fyrir alla

Sigursteinn Sigurðsson
Menningarfulltrúi SSV